Heber 5 : 5 - 10 

HURIA  KRISTEN  BATAK  PROTESTAN

BAHAN  SERMON RESSORT  TANAH  JAWA  –  HURIA  TANAH  JAWA

Ep.                                                                                                                                           Heber  5 : 5 – 10

 

1.   PATUJOLO.  Songon na taboto, disurat Heber on do tangkas dipatorang, na “Sintua ni Malim” do Tuhanta Jesus Kristus, na dipaumbuk tu Psalm 2 : 7, namandok “Anak – Hu do Ho, sadarion do Ho Hutubuhon”, laos songo i nang na di Psalm 110 i pe tong do dipaumbuk surat Heber on, ai didok :  “Malim do Ho ro di salelenglelengna, mangihuthon horong ni si Melkisedek” (ayat 4 : Melkisedek lapatanna : Rajangku na sintong = Rajaku benar). Tung tangkas  ditanda surat Heber on do, na Tuhan Jesus Kristus do manggohi sude panurirangon na adong di Padan na Robi (Mateus 16 : 15 – 16).

2.   HATORANGAN. Di Heber 5 on tangkas do dihatindanghon Panurat ni surat Heber on, na Kristus i do Sintua ni Malim na tutu, ala Debata do mangalehon sahala tu Ibana, jala na hinatindanghon ni Debata, songon na di Psalm 2 : 7 i : “Anak Hu do Ho, sadarion do Ho Hutubuhon”, dohot na di Psalm 110 : 4 i, na mandok : Malim do Ho ro disalelenglelengna, mangihuthon horong ni si Melkisedek”. Dung i ma turpukta sadarion. Ditingki mangula Jesus Kristus di portibion dope, jolma situtu do Ibana, ala ni i diulahon Ibana ma songon angka ulaon ni Malim ni Joro diportibion, pasahathon pelean dohot peleanNa, manang pasahathon pangidoanNa tu Debata, mardongan elekelek dohot angguk bolon dohot iluilu, jala ditangihon Debata do Ibana. Di na martangiang Jesus di Getsemane dohot di silang i, tung mardongan tangis dohot anggukangguk  do Jesus mangalualu tu Debata, AmaNa i.

Ayat 7 – 8 : Dipaboa na dua ayat on do, paboa Jesus Kristus i, jolma situtu do Ibana, di namangula Ibana diportibi on, laho manggohi (menggenapi) panurirangon ni angka panurirang na Robi. Tarida do sian angka ulaonNa : mangajari, marjamita, tartangkup, dileai, diparsipal, diparsilanghon, tariluilu, mangangguhi disilang i, dohot sahat ro di namate. Alai laos Debata situtu do Ibana, manggohi angka panurirangon na di Padan na Robi. Tarida do i sian angka ulaon halongangan na pinatupaNa, isarana : pamalum ragam ni namarsahit, mangalehon mangan 5000 halak marhite dua dengke dohot lima roti, pangoluhon naung mate, mangusir tondi na hodar, marsangap didolok, jala hehe muse sian namate. Tingki di hajolmaonNa i Jesus, sai tu AmaNa i do Ibana mangalualu, jala ditangihon Debata, AmaNa i do Ibana. Alani i ndang mabiar jala tahutan Ibana mangadopi hamatean i, ai i do tujuan ni haroroNa tu portibi on, pasauthon “Sangkap Hatuaon” ni Debata, laho paluahon jolma sian parhatobanon ni dosa dohot hamatean alani dasa i. Nang pe Anak ni Debata Ibana, alai dipatuduhon do pangoloionNa di Ama i, jala lumobi tarida ma i marhitehite na burju Ibana na marsitaonon i, songon naung disuriranghon “Ende ni naposo ni Debata” na paopathon i, ima Jesaya 52 : 13 – 53 : 12 i.   

Ayat 9 – 10 : Di sude pangoloionNa di habebernit ni na tinaonNa i, gabe rimpas (sempurna) ma hasasaut ni “Sangkap Hatuaon” ni Debata di portibion, laho paluahon jolma pardosa, na olo manopoti dosana, jala na porsea di Tuhan Jesus. Jala ala ni pangoloionNa do Ibana digoari : “Sintua ni Malim”, mangihuthon horong ni si Melkisedek, naung digoari di Psalm 110 : 4 i : “Nunga pola maruari Jahowa, jala tagamon solsolanNa bagianNa : Sai Ho do Malim ro di salelenglelengna mangihuthon horong ni si Melkisedek”. Sian i tangkas ma nuaeng dihita, paboa panurat ni surat Heber on pe, manghatindanghon, na Jesus do Sintua ni Malim, jala birubiru ni Debata na “mamorsan dosa ni portibi on” (Johannes 1 : 29).

3.   POKOPOKOK SIJAMITAHONONHON. :

a.    Marhite Jesus Kristus dipalua do hita sian hamatean : Anggo sian ompunta sijolojolo tubu do, ndang adong tandaonta hangoluan na manongtong i, ai dibudaya dohot di haporseaon ni halak Batak najolo, holan diportibi on jolma manghirim. Ai molo mate jolma, daging i gabe tano, hosa i gabe alogo, jala tondi i gabe begu. I do alana adong filsafat ni halak Batak najolo ‘……agia malapalap asal ma dihangoluan”. I ma dangolna jolma najolo. Tuani ma ro Tuhan Jesus tu tano Batak, diain ma hita gabe bangsoNa, jala diajari ma hita manjaha Hata ni Debata, ai sian Hata ni Debata do tatanda  Debata Sitolusada i, tatanda ma dosa dohot hamatean na salelenglelengna, tatanda ma nang haluaon na pinatupa ni Jesus Kristus, dohot hangoluan na salelenglelengna di banua ginjang i. tatanda ma nang dosa dohot hasesaan ni dosa, songon i nang hamubaon ni roha, lumobi tatanda ma tugas ni angka na porsea : mangulahon na denggan dohot manghaholongi Debata dohot manghaholongi dongan jolma.

b.    Nang pe songgop tu hita sitaonon, ingkon tong hot pangoloionta di Ibana : Molo didok Kristen manang siihuthon Kristus hita, ndang marlapatan i, na so alamanta  be parungkilon, manang sitaonon saleleng ditano on hita. Alai angka na porsea i ndang mabiar manang ganggu rohana be mangadopi angka tantangan/parungkilon ni ngolu, ala tahaporseai do na didongani Jesus Kristus do hita tongtong.  

Ibana do Sintua ni Malim mangihuthon horong ni si Melkisedek molo didok Sintua ni Malim di ngolu parugamoon ni halak Jahudi, ibana ma na pasahathon pelean tu Debata dibagas Joro i, jala laos ibana do na pasahathon pasupasu tu natorop i atas goar ni Debata.

Thema : Tuhan Jesus do Sintua ni Malim jala Birubiru ni Debata na mamorsan dosa ni hajolmaon.

1.    Jeus Kristus do Sipalua diangka na porsea na olo paubahon rohana.

2.    Nang pe songgop sitaonon, ingkon hot do pangoloionta di Ibana.

3.    Ibana do Sintua ni Malim na tigor i.

Tanah Jawa, 13 Maret 2015_Bvr. M. Lumbansiantar