Psalm 66 : 8 – 20

Patujolo.

Di jolo ni turpuk on (1 – 7) dipatupa Debata Jahowa do ragam ni ulaon nabalga, laos marhite sian ragam ni ulaon i do dibahen Debata mangajari jolma, asa lam mananda hasongkalonNa, hamuliaonNa, huasoNa, hagogoonNa dohot panarihonNa lao marmuduhon na tinompaNa i, lumobi hita jolma.

Dungi tarida ma diturpukon namangarahon hita jolma (bangso) asa tangkas mamuji Debata sian nasa roha, ateate, nang pingkiran lapatanna marsitutu laho mamuji Debata, ima marhite ende naimbaru jala nauli, marhite tangiang, jala dungkon ni i marsasahalak porlu situtu adong parsaoran (Markoinonia) laho mamuji dohot pasangaphon Debata.

Hatorangan.

Pengalaman pribadi dibagasan haporseaon ni parPsalm jotjot do i gabe pengalaman ni bangso Israel jala ende ni par Psalm i gabe ende ni bangso i. Boasa masa sisongon i, ima ala sisada ihot do parPsalm dohot bangso Israel diadopan ni Debata naung mamillit nasida gabe bagsoNa huhut naeng manghilala ragam ni parsorion dohot dinaung rap mandai di ragam ni pasupasu.

Na ingkon Debata Jahowa do pujion diganup angka siulaon :

1.     Ala Debata do silehon hangoluan, haluaon dohot pangaramotion na tangkas. Manghilala parPsalm dingoluna marhite haporseaon, ia so alani Debata na manarihon nasa na ringkot dingoluna, mago humasusa, jala mate do nasida

2.     Ala holan Debata do  na tuk mambahen jolma margogo jala manahan diragam ni pangunjunan na rongom tu ngoluna. Jala parungkilon manang pangunjunan i ndang manghorhon tu pandelean, hajahaton, hamatean alai gabe manghorhon tu habengeton ni roha, hatauon, panghirimon dohot las ni roha.

3.     Diragam ni ulaon na marsituhu naung pinatupa ni Debata dingolu ni bangso i nang dihita ganup, digodang ni pasupasu na tajalo be, ringkot situtu adong alus manang respon sian hita maradophon Debata. Angka dia ma na ringkot sipatupaonta?

a.     Mangharingkothon ngolu na beribadah (ngolu parhuriaon) isara ni parmingguon, partangiangan, ulaon Diakoni sosial dla

b.     Rade pasahathon pelean na patut, ido na manungkoli asa lam margogo huria i laho pararathon harajaon ni Debata disandok portibion. Jala molo pinasahat pelean tu Debata marhite huria i ndang asa dipasupasu Debata ngolunta manang hira namanubut roha ni Debata rupani. Alai ala naung dipasupasu Debata do ngolunta

4.     Marlaba do na loja, ido pandohan na jotjot binege laho mangolophon ulaon na denggan pinatupa ni sasahalak. Ido tutu, alai bolas do ndang marlaba halak angka naung loja mangula sada siulaon molo adong ditahi rohana hajahaton.

5.     Dihabuluson ni roha laho martangiang tu Tuhan i, ndang marsipangalesem dibagasanna, ndang alani na terpaksa, Ala na so tarjua, sai na jaloonta do angka na tapangido i molo porsea do hita di Tuhan i (Mat. 21 : 22) antong tapuji ma Debata tadok ma mauliate, na so manulak jala manjalo tangiangta huhut napasahat ragam ni asi ni rohaNa i. Amen    

Oleh : Bvr. Meri Lumbansiantar

HKBP Tanah Jawa