1 Rajaraja 19 :4 - 8

1.     Ia turpuk jamita tu partangiangan di minggu on, dienet do sian buku Raja-raja  bd. 19, taringot tu : na dipangkulingi Jahowa panurirang Elia jala dipasahat Debata tonaNa tu ibana. Maporus do panurirang Elia tu halongonan, ala dilele si Isebel (tunggane boru ni raja Ahab sian raja Israel utara) ibana jala sahat ma si Elia tu dolok ni Debata na margoar Horeb. Bingkas ni pangaleleion ni si Isabel tu panurirang Elia, ala dipaboa raja Ahab tu si Isebel, pardihutana i, naung diseati/dibunui si Elia sude angka panurirang dewa baal, na sinomba ni si Isebel.

2.     Ala ganjang ni dalan sidalanan ni si Elia, geba loja ma si Elia, jala pola dua hali ibana mangulon ditongan dalan, jala tarpodom, gabe ro ma surusuruan ni Jahowa mandungoi ibana laos marsuru si Elia mangan dohot minum. Sasintongna nian, nunga mandele si Elia, jala nunga lomo rohana mate alai ndang di loas Debata Jahowa, ala godang dope siulaonna songon naposo ni Debata.

3.     Pola do dipangido si Elia asa mate ibana ala borat ni na masa tu ibana, loja mardalan dibagasan sadari jala ndang mangan minum, hosana terancam binahen ni si Isebel, magopu do rohana binahen ni pangalaho ni bangso i na tong marsomba baal. Hundul ma ibana marlinggomlinggom di toru ni hau tadatada. Didok ibana na so pola dumenggan ibana sian angka ompuna. Dihilala ibana na so adong perobahan hinorhon ni pangulaonna, ai sai mulahulak  pangalaho ni bangso i dao sian Debata.

Pangalaho ni bangso i nunga dao sain Debata, alai luar biasa do na pinatupa ni Elia na pola 450 panurirang ni baal di paintop/ditaluhon ibana. 1 Rajaraja 18 : 22.      

4.     Boi do ditingki gale daging loja pingkiran ni si Elia gabe gale dohot partondiona, moru panandaonna dohot haporeanonna tu Tuhan i, gabe hira na putus asa ibana, pola dipangido ibana asa mate ibana. Di ida ibana ancaman i lam leleng lam torus, hape gumogo do Debata Jahowa sian angka i sude. Ai molo lomo roha ni Debata talu do i saluhut, jala ringkot dope si Elia di Debata Jahowa

5.     Ditingki muncul hagaleon ni si Elia disi ma Debata ro mamangkulingi ibana marhite na ro sada surusuruan  manjama ibana huhut didok tu ibana : “Hehe ma ho mangan”.

Ditingki modom di linggom ni hau tadatada i, disuru surusuran i ma ibana mangan. Ditangihon Debata do holso ni rohana i umbahen na jumpang  dohot surusuruan manjama ibana di modom ibana di toru ni hau tadatada i. Sipanganon  i bahen gogona laho manguduti pardalananna muse tu dolok Horeb. Dua hali ma surusuruan i manungguli ibana, paingothon ibana asa mangan.

6.     Ala ringkot do di Debata si Elia disarihon do dohot panaganonna. Ndang dioloi Debata ibana mate. Jadi molo tung pe dipangidohan jolma i dirina mate, molo ndang dope ninna Debata ndang jadi mate. Hot do rencana dohot sangkap ni Debata di hajolmaon songon na tu si Elia i. Dapot  panorangion do ibana sian Debata taringot tu nanaeng sidalananna.

Tarsunggul do ibana ditingki na tarpodom huhut magopu, disungguli Suruan ni Debata  do si Elia tu angka na ringkot hombar tu ngoluna.

7.     Sada sagusagu na ginoreng dohot sada gunsi marisi aek boi margogoihon si Elia di pardalananna tu dolok Horeb, lelengna opat pulu ari opat pulu borngin. Ala sian Debata do haroroan ni sipanganon i tung marpanghorhon do. Ai so adong ukuran sipanganon sian Debata. Sipanganon na sian Debata ido gogo dohot hahipason. Disarihon Debata do angka na rade mangoloi dohot mangulahon parsuruonNa.

8.     Sasintongna nunga songon “ tandiang na hapuloan’ (kesepian) paimaon panurirang Elia hatihai, ai holan ibana nama na tading jala mangolu sian angka panurirang ni Debata, ala nunga diburu si Isebel sude angka panurirang ni Debata, umbahen na magolu pe si Elia alana maporus do ibana tu halongonan, jala tung mandate situtu  di hilala na maporus i, dipangido rohana naeng mate. Ro ma hata ni Debata mamangkulingi ibana. Tongtong hata ni Debata mamotivasi, na manogihon  dohot na mangulahonsa,  songon si Elia gabe boi cerdas dohot pistar jala diboto maporus sian parmaraan na ro manahopi ngoluna. Hata ni Debata manjujui roha ni jolma asa dihatahon sintong sintong angka parniahapanna tu Debata.

9.     Reaksi ni si Elia tu hata ni Debata na jinalona : Dipaboa ibana sude angka parsorionna dinamangulahon tohonana ibana. Paboa Tuhan i do ro mandapothon angka na hinaholonganNa, songon si Elia on, didapothon Debata marhite surusuruanNa, diantoi jala disarihon do ibana.

10.  Ingkon haporseaonta do paboa hata ni Debata mambuka rohanta (mamotivasi hita) :

-        Asa unang segan rohanta laho pasahathon pandelean ni rohanta tu Debata.

-        Laho paboahon na taalami  angka hamaolon siala ulaon ni Debata na taula.

-        Laho paboahon tu angka jolma na manadinghon hata ni Debata.

-        Laho paboahon ancaman ancaman na ro tu hita, boi do paboaonta tu Debata.

-        Angka parmaraan na boi mengancam hosanta asal ma tapaboa terbuka dohot sintong sintong.

11.  Ingkon porsea do sude naposo ni Debata : na mangan do sude naposo ni Debata namangulahon tohonannai dohot sintong jala sian nasa rohana, ala Debata do pasahathon tohonan i tu hita, jala marlangku do i di ganup zaman. Theologi Elia on ma na boi dohononta : molo ndang adong na mora mangalehon mangan ibana, boi do na pogos, na mabalu di jou Debata mangalehon mangan, jala molo so adong pe jolma na mangalehon mangan, tarbahen Debata do pidong sigak mangalehon naposoNa mangan, nang ditingkion (1 Raja 17). Na rade do saluhut dibahen Debata diangka naposoNa  na mangula ditongatonga ni HuriaNa. Amen

Oleh ; Bvr. M. Lumbansiantar

HKBP Tanah Jawa