HA-IMBARUON NA BINOAN NI JESUS

                                                                                                                                                                                  Karya : NN

Narator               :   Borhat do angka Parbarita nauli tu sandok luat  poretibi on hombar tu parsuruon ni Tuhan Jesus tu angka naposoNa di Mat. 28 :19 – 20.

                                 Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia. Laos ajari hamu ma nasida mangaradoti nasa hata naun Hupatikhon tu hamu. Ai idama sai na dongananKu do hamu ganup ari rasirasa ro ajal ni hasiangan on.

Adegan  I

Situasi                 :   (Masuk Parbarita Nauli tu pentas mamboan Bibel/Buku Ende).

P’barita nauli I    :   Pauba hamu ma rohamuna, ai nunga songgop harajaon ni Debata.

P’barita nauli II   :   Ai songonon do holong ni roha ni Debata di portibi on, pola do Anakna na sasada i dilehon asa unang mago ganup na porsea di Ibana, asa hangoluan na saleleng ni lelengna di Ibana, (Laos mulak jala pajumpang dohot natorop I, II).

Natorop  I            :   Bah,,, na sian dia do hamu angka dongan ?

P’barita nauli I    :   Oh,,, na mulak sian bagas Joro do hami.

Natorop  II           :   Bagas Joro ?,, Aha bagas Joro !?

P’barita nauli II   :   Ima inganan parpunguan ni halak siihuthon Jesus Kristus.

Natorop  II           :   Baaaa,,,  ido hape ate ! Hubereng sian pardompakanmuna , mansai las rohamuna idaon, sonang do huroha roha ni angka jolma molo masuk tu punguan i, gabe tartarik do rohangku naeng dohot tu punguanmuna i.

P’barita nauli I    :   Ai tu dia do hamu huroha, jala lao tu dia?

Natorop  I            :   Sian luat na do hami, na naeng mangalului pangabahanni ngolu. Alai ndang adong dope di hutanami punguan na songon on.

P’barita nauli I    :   antong molo songon i, olo do hamu mangihuthon hami dhot mangihuthon Jesus na huhaporseai hami?.

Natorop  I,  II       :   Olo do hami inang.

P’barita nauli II   :   Molo songon i do pandokmuna, beta hamu ma (Laos borhat nasida).

Adegan  II

Narator               :   Songon i ma denggan ni parsaoran dibagasan Kristus I, godang do n manghasiholi barita nauli, jala nunga torop jolma gabe siihuthon Kristus. Alai sai adong dope halak na olo dielaela sibolis i tu lomo ni rohana.              

Raja ni sibolis     :   Ha... ha... ha... ha... hamu angka paranganku ! marpungu ma jolo hita, ala naeng patupaon do rapat kilat.

Parangan  I          :   olo raja nami (laos masuk sude paranganna huhut marsomba)

Raja ni sibolis     :   Hubege baritana nunga godang jolma i na gabe siihuthon Kristus. Aha do ula hamu saleleng on. (disonggak parangan i sude).

Sude parangan     :   (tarsongot jala mabiar)

Raja ni sibolis     :   Saonari ingkon paboaonmuna ganup marsada sada, aha do naung diula hamu salelengon. Ho ma jolo, bahen laporanmu (disonggak jala di tudu tu sahalak parangan).

Parangan  I          :   Ianggo ahu rajanami, ahu ma na lumoja, tung mansai godang do na huula. Ai disi huboto kabar i, pintor laho do ahu tu luat i, jala hutopoti ma roha ni ganup siihuthon Kristus. Huela ma nasida asa alho mardatu i, mangido angka panjaga ni daging, baaa,,, ia adong na marsahit tu datu ma i diboan rajanami.

Raja ni sibolis     :   Bagus,,, bagus,,,, nunga na malo ho tutu. Saonari ho ma jolo (laos ditudu na paduahon).

Parangan II          :   Molo ahu mura do hubahen rajanami, hujujui do nasida asa sai laho tu lapo minum tuak, hape pajumpang ma disi angka na mardongan. Hujujui ma nasida marjuji. Molo ndang marjuji, minum tuak sahat tu na tenggen. Jadi holan na marjuji do nuaeng angka amanta, molo talu marjuji olo do lalu tangan tu angka anantana, jala muruk muruk tu gellengna.

Raja ni sibolis     :   bagus.... bagus... bagus.... haru torushon ma poang, ho ma muse poang (ditudu na patoluhon).

Parangan III         :   Ulaonku do na umborat raja nami, alana ganup ari minggu sogot manogotnai pintor laho ahu manopot roha ni halak Kristen i, hu-ela ma asa unang lao marminggu, gabe adong ma na lao mangkail, jala adong na laos renge modom.

Raja ni sibolis     :   ha... ha... ha... ha... pandena i ho tutu, laos toruhon ma i ate !. Ho ma jolo poang (ditudu na paopathon).

Paranga IV          ;   Molo ahu rajanami, mura doi. Hupamasuk do ginjang ni roha tu angka na mora, jala hugintali asa dipauli tugu ni ompungna. Didokkon ibana ma sude partubuna asa manggarar guguan, hape adong do dongan sabutuha nai na so sanggup manggarar ala ni pogosna, alai tong do dibahen guguanna dos dohot angka na morai. Alani i terpaksa ma digadis haumana, diujungna marbadai ma nasida, sahat tu namasi latean, ndang domu be angka na marhahamaranggi.

Raja ni sibolis     :   Hemmmmm.... nga na hebat i, ulaonmi poang torushon ma ate !. jadi ho ma jo muse,,, baen laporanmu (ditudu parangan na palimahon).

Parangan  V         :   Ahu rajanami, husuanhon do hamalason tu nasida, molo ro rajai tu na huingani i, holan na di kode do angka ama, ndang laho mangula tu balian, holan angka ana do na mangula, hape molo so adong sipanganon dijabu, tong do angka ina i hona songgahan, gabe susa do angka keluarga hubahen.

Raja sibolis         :   Nga na denggan i tutu, haru tambai ma muse ate ! ho ma muse paboa ma jo aha naung niulam (ditudu parangan VI).

Parangan VI        :   Tutu do godang angka kristen rajanami, alai ditingki masuk tu garejahalaki, pintor masuk do ahu tu bagasan rohanasida, gabe marhusipi, mondohondok, marangan-angan, heheamon do naside hubahen, ndang dibege be  jamita i. Nang tu angka parhalado masuk do ahu, hubahen do nasida ndang masiantusan, ujungna marbadai, gabe gaor ma nang angka kristen i.

Raja ni sibolis     :   Tuanima i poang, ndang hurimpu boi bahenonmu songoni. Ho ma muse  (ditudu napapituhon).

Parangan VII       :   Sian nasa usaha do hubahen manursari halak kristen i, gabe ndang adong dos ni roha dohot hasadaon dinasida. Molo jumpang tingki mangula tu hauma, masibaen lomona be do nasida, marsiangkal-angkalan jala masilatean. Gabe disegai hama do na niulana jala susa ma nasida.

Raja ni sibolis     :   Tuani ma poang dibahen ho songon i. Ho baen jo laporanmu (ditudu na pawaluhon).

Parangan VIII      :   Ahu rajanami, ulaonku ma naumborat, alana tu naposo doa au masuk. Tangkas songon nabinoto ni raja i, halak  on do na gabe generasi penerus. Nasa usaha do nuaeng hubahen  mangela nasida asa marganjai, marisapi, nang angka parsingkola cabut sian singkola laho marbola tullang, jala pahabishon uang singkolana huhut mangulahon angka najahat.

Raja  ni sibolis    :   Ha..., ha,,,, ha,,,, holan angka na jago do hamu hape, boi do taboan jolma itu lomo ni rohanta, alai tu joloanon ingkon lam marsitutu do hamu manegai angka kristen i. Saunari hupaborhat  ma hamu (jongjong ma raja ipaborhathon paranganna).

                                 Hamu angka dongan, gok bura ma hamu, gok late, hosom, ginjang ni roha dohot panginsahion. Borhat ma hamu.

Narator               :   Songonon ma tahi-tahi ni sibolis laho mangago angka jolma na olo mangihuthonsa. Dibahen i torang ma rohamuna                                     do alomuna sibolis songon babiat na marauang mangalului sibondutonna.

Adegan  III

(Pajumpang angka na pinaoto-oto ni sibolis).

Situasi                 :   Na marsahit (naung marubat tu datu). Gale pamatangna, marsak jala maheu.

Na pogos             :   Ai na sian dia do hamu eda, songon na gale hamu hubereng ?

Na marsahit         :   Ee....ee.... da eda, ai na marsahit do ahu, jala na baru mulak sian parubatan do ahu, hape ro parubat i mandok : ula-ula ni halak do on, na adong do alo muna ninna, jala didok : asa boi malum ingkon boanon manuk na bontar  dohot na rata-rata, massam dope tahe  dipandok. Songon na so tarula be i. On ma hape upana molo nioloan hata-hata ni sibolis. Ia hamu eda na sian dia do, songon na murhing do tong pardompahanmu.

Napogos              :   Na sian jabu ni anggingku na mora siginjang roha an do ahu. Napauli tugu da hami na saompu, hape  dos dibahen guguniba dohot angka na mora i, aha ma bahenonku tusi, ujungna gabe marbadai ma hami. Ai marpogos pe hami tong do alani na maora i, ai adong do haumangku di ibana, hape diporso....... ia hamu na boha do songon na tungki simanjujungmu.

Parjuji                 :   Ee... ee... da inang, ndang tarpaboa-boa be i, sude nunga habis haumangku targade, dakdanak pe ndang marsingkola be, jala ahu sandiri pe nunga marniang alani na sai marjuji, mardomu parjuji taludo iba. Songonon ma hape molo sai pinaolo-oloan hisap-hisap ni daging. Ia hamu inang, boasa marsak jala martuktungkian hamu ?

Na susa                :   Aha ma so marsak jala martuktungkian iba da amang, ai so adong dapot gogo ni na niula, suda dibahen hama. On ma tahe na so adong on dos ni roha dohot sada ni roha, gabe susa ma iba. Ia ho anggia na beha do ho ?.

Parsingkola         :   I ma da...inang ! na dipecat do ahu sai singkola, tong ma i alani pangalaho niba na so ture, ai holan na cabut iba sain singkola, pinasuda muse uang singkola, orang tua pe nga maos mangahdap guru, jala nunga maos pinda iba sian sada singkola tu singkola na asing, alai tong so marnajora iba. Jadi na hubahen do ahu susa.

Situasi                 :   (Masuk parbarita nauli dohot natorop  I, II)

P;barita nauli I    :   Horas ma dihamu angka dongan !

Sude                    :   Horas ma tutu, ai ise do hamu tahe ?

P;barita nauli I    :   Parbarita nauli do hami. Nunga hubege hami angka panghataionmuan sain nagkin.

Napogos              :   Jadi na naeng mangalehon hepeng do hamu di hami?

P;barita nauli II   :   Daong,,, alai na ummarga  sian i do pasahaton tu hamu ima hata ni Debata manang barita nauli : Naung ro Iesus paluahon hitra sian gambo lisop ni dosa i dohot sian parhatobanan ni sibolis.

Parjuji                 :   Ai aha huroha pardomuan ni i tu na masa na huadopi hami on?

Natorop  I            :   Marprdomuan situtu do i. Ai dosa i do sibingkasi ni nasa hasusaan, alai sibolis pangago i do mangela hita jolma mangalaosi hata ni Debata, gane madabu tu dosa, dungi tu hamatean. Diela do asa marbadai na marsaripe, na marsahuta, masulatean angka na marhombar balok, ai parangkal na sumalim do sibolis i, ndamng lomo rohana sonang jala mardame jolma i.

Natorop  II           :   Tutu do i angka dongan, laho manegai nasa ulaon ni sibolis i, ido umbahen na ro Jesus tu portibi on. Ai nunga lam tu na raratna dosa i disaburhon sibolis i marhite jolma na olo rajaanna. Dibahen i jaga dirim jala pauba hamu ma rohamuna, ai tung hamatean dohot hamagoan saleleng-nilelengna do jambar ni halak na mangoloi sibolis, alai tu hangoluan na saleleng-nilelengna do na magoloi Debata.

P’barita nauli II   :   Antong angka dongan ! oloi hamu ma Debata, alo hamu sibolis i, dungi maporus maibana sian hamu.Pajonok hamu ma tu Debata, dungi pajonokhonNa ma tu hamu. (Jakobus 4 : 7 – 8).     (laos masuk sude pemain).

Sude Pemain       :   mangendehon ende no 792 : 2.

Tamat